Ostiral gabean "Tivoli" tabernan…
Hori duk!
Esan diok nahi duana
Ez ezak gehiago galdu
Denbora
Puroen keak apaindutako
Neoi argien begiradak zipristindua
Kurbak ikusten.
Bai titimuturren bai sudurren kurbak…
Bai mutturrenak
Denak berdin begiaren zati
Gizona erakutsiaz
Hori duk!
Galdu denbora
!!!!!!!!!!!!!!!!!!!
O.Arantzabal
RSS jarioa
zerdiok -ek esandakoa:,
2006 Urria 23 @ 20:56
TIVOLItik
zahartzen ari garenok badakigu
denbora
ez dela inoiz galtzen.
Denbora,
pilatu egiten da,
bildu,
gogortu harriak bezala.
Gurekin daramagu
patriketan sartuta.
Irribarre behartuen patriketan,
haserre ahaztuen patriketan,
oroitzapen bihurtu diren patrika estuetan.
Gero, tarteka,
bizitzak
patrika horiek hustutzeko paradak ematen ditu.
Bakarrik sentituko haizenean,
itsasoari edo ibaiari edo putzuari begira,
banaka hartuko dituk harri horiek
eta uretara jaurtiko dituk urruti.
Uretan, hire oroitzapenek,
borobil gero eta handiagoak egingo dituzte,
eraztunak bezala.
Eta orduan ulertuko duk
denborari lotuta hagoela erremediorik gabe,
hire oroitzapenekin ezkonduta.
Kasu egin zaharrei,
denbora ez da inoiz galtzen.
Aukerak dira,
galtzen direnak.
Martin Etxeberria