ZERDIOK

Denbora dagoenean beste modu batera ikusten da zerua, adibidez taberna bateko lehiotik begira zaudenean. Hodeiak, mugimenduz beteak, hutsuneak uzten dituzte eta argia ikus daiteke zeru urdinean zehar. Taberna barrutik haizea ezin da ikusi, baina bai nabari, lurreko hostoen mugimenduan eta udaberriko kimuen dardarrean, baita ile kixkurren dantzan… gortina zabalduta argi izpi bakan horiek nire begietara iristen dira…

Oier

salitre…

gauza amaigabe batengatik

Aprobetxatu orain, elurra dagoela, bihar agian ez baita egongo.

SLN

Isiltasun honekin amaitzeko hitzen bila… Googlen begiratu dut eta ezer ez. Sukaldera joan nahiz eta frigorifikoak ere ez dit fundamentuzko ezer eskaini. Baso bat ur hartu dut, baina ura gardena zegoen, hoztuta agian (ez du bufandarik). Kanpoan euria ari du, nahiko isil. Nahiago dut kazkabarraren doinua (buruan jotzen duenean ateratzen duena izan ezik).

Behintzat hau irakurri duenak jakin dezala Txinak blog hau ez duela zentsuratu.

SLN

Harridura senti beharko nukeen momentu honetan nazka barreneraino zait sartua. Bizitzaren ukazioak sortutako nazka sakon bat… izan ere duela bi egun, bost tiro bota zituen gudari abertzale batek Euskal Herri independiente baten alde, abstentzioaren alde eta eskubideen alde… Euskal Herri sozialista aske baten alde…

Isaiasen semeek ezagutuko duten baten alde…

Faxismoa faxismoaren aurka,
euskal marxisten lema.

Email anonimoak bidaltzen zizkion bere buruari. Gehienak maitasun deklarazioak ziren eta adjektibo positiboz jositakoak beste asko. Egun batean, ordea, X izeneko batek idatzi zion esanez zer egiten zuen berari, X-i, email anonimoak bidaltzen. Ez zuela inor maitasunaren jokoan harrapatzeko ahalmenik eta buruko ileak aspaldi galdu zituela gaineratu zion X-ek. Eta, mesedez, hegia hatxe gabe idazteko, ertza aipatu nahi zuenean izan ezik.

SLN